蔡約翰頭馬數字已經大幅帶出，今季再做冠軍練馬師都冇乜走雞，更多馬迷已經講緊，到底阿蔡今季頭馬會唔會突破100場。周日(18日)跑打吡蔡廐嘅「當家精選」 同「平海福星」都係牌面馬，配上莫雷拉同莫雅兩大高手，若最終蔡神仙贏打吡，應該都冇人覺得驚訝。

蔡約翰啲質新馬有幾勁都唔使多講，好多四班起步嘅PPG(自購新馬)隨時連珠炮發一口氣贏上頂班，係阿蔡爭冠軍嘅最強籌碼。不過，今季阿蔡旗下啲唔起眼嘅舊馬，好多都令人有意想不到表現，跑得多跑得密卻每每唔信唔信又贏一場，啱啱夜馬嘅「運財童子」就係最佳例子，喺公眾普遍看淡下，失驚無神就爆20幾倍冷Win。

其實今期有份跑嘅「勇闖者」同「駿明珍寶」，同下次夜馬(21日)正選嘅「話得事」同「龍船」，都係今季可以攞勤功獎嘅蔡廐馬，阿蔡安排呢手馬密密出賽，據知係希望趁勇盡贏或交代，等馬房喺季尾階段或下季初換血，引入更多有質素嘅新兵。馬迷呢段時間可以留意吓呢類密密跑嘅蔡廐馬，因為出得嚟跑就係想爭取表現。

蔡約翰一直嘅方針都係一兩季盡量交出表現，跑盡嘅馬就換血。今時唔同往日，馬主亦唔追求養隻馬一路跑到十歲，喺即食文化下，好多馬主都唔介意，阿蔡短時間內幫馬主贏到盡，到摸頂時馬主可以申請退役換馬，想繼續養亦可以轉倉。

正所謂有麝自然香，阿蔡練馬交到成績，本身買馬又有可靠貨源，根本大把馬主排住隊想入阿蔡馬房，事實就算肯揼本買馬，都未必入到阿蔡馬房。阿蔡練馬風格未必人人受落，但以成績論，唔能夠否認佢做緊嘅係香港馬圈嘅成功方程式。

阿Joe