7.1公眾假期，香港的電影票房數字相當驕人，《強戰世界》收三百多萬，《頭文字D》收二百多萬，《龍咁龍2》收一百五十多萬，總票房逾七百萬，即是有十多萬人次在當天看電影。
三齣電影戲種截然不同，《強》片像是一雙美國名牌高科技跑鞋，《頭》片是港、日、台crossover的潮物，《龍》片則是地地道道的親切人字拖；觀眾既想擁有跑鞋，又當然要貼近潮流，但也想有對人字拖傍吓身。由於選擇夠，市道好，於是大家都好。
萬二分緊張票房，所以一得閒便上網，透過Cityline及百老匯院線的訂票網頁觀看假日的售票情況，幾天下來，累積了一些心得：最早滿座的是UA朗豪坊及觀塘Palaceapm，晚上的戲票幾乎在午間已售光，相信是因為兩間戲院均設在以年輕人為主要對象的商場，正所謂目標觀眾喺晒度。同樣是商場，UA東薈城與黃埔便疏落得多，東薈城位置偏遠，難怪少街外客；但黃埔則諗極唔明，照計都係大銀幕戲院，附近又有美食坊，點解硬係得三、四成觀眾，業內人士曾笑說，若然黃埔都滿座，套戲起碼收一億。