【政壹花生友】
被民主黨開除黨籍嘅前中委黃成智，前排聯同民主黨成員狄志遠高調鬧爆民主黨，仲宣佈佢哋正物色志同道合嘅朋友籌組參政平台，目標放喺今年底區議會換屆選舉同明年中立法會換屆選舉。
有泛民中人好坦白咁同花生友分析，以成智今時今日嘅實力，話會對泛民帶嚟好大影響就談唔上，但話佢完全冇影響又未至於。至於影響去到幾深？視乎成智平台有啲乜人、會派人落邊啲地區，以及最關鍵嘅問題：錢從何來。

錢從何來成關鍵問題

呢位泛民中人話，泛民主派打選戰，從來都係先諗好策略、目標，然後再想辦法撲水去落實；建制派就係完全相反嘅玩法，即係等大水喉泵咗水落嚟，先至去考慮策略、目標等問題，換言之就係諗吓點樣使咗啲錢。而成智呢次被趕出黨後，話咁快就話要派人參選，錢從何來，好多泛民都議論紛紛。
雖然成智實牙實齒話佢個平台唔會做保皇黨，但呢位泛民中人覺得，以成智今次喺政改嘅態度，難免會被人懷疑，佢撐袋住先以致搞智庫嘅安排，都似係想踢走泛民主派、尤其係民主黨。泛民中人仲話，區選打法同立法會選舉好唔同，以𠵱家距離區選得番百幾日時間，家吓先落區插旗根本就太遲，所以佢相信成智真正目標係明年立法會選舉。成智到底乜嘢葫蘆賣乜藥，花生友都拭目以待，最關注當然佢搵到乜人同有乜新搞作。

花生友