當年今日

【李八方online】「劏房阿哥」搞乜鬼 決戰日一早去拜山?

蘋果日報 2018/11/24 16:17

立法會補選伍廸希劏房阿哥

聽日就係立法會九西補選投票日,5位候選人理所當然埋身肉搏,全天候拉票,「劏房阿哥」伍廸希卻決定喺大戰日,慎終追遠去拜山。佢同八方講,聽日朝早7點會先到柴灣哥連臣角靈灰安置所,喺媽媽嘅骨灰龕前奉上鮮花,同佢交代一下近況,指03年過身嘅媽媽雖然係文盲,但關心世界,執着於追尋人性嘅真善美,係自己認識呢個世界、尤其香港真象嘅啟蒙,自言敢於對抗虛偽、敢講心裏話,「勇氣嘅泉源源於她」。
以為之後佢就返九西拉票?咁易畀大家估到咩!查實佢之後係會到柴灣華人永遠墳場向亡父致祭。原來伍父喺太古船塢工作幾十年,因為燒焊工作得咗石棉肺,幾年前因肺衰竭去世,憶述老竇成日督促自己要學好英文,以免似佢咁做牛做馬、被人輕視,又話老竇一年只放6日假,星期日都加班,向兒女做咗個認真工作、按步就班嘅好楷模。
伍廸希相信,雙親會好高興自己喺投票日向佢哋匯報戰況喎,之後佢就會去返九西最後衝刺;至於今日,佢亦去到土瓜灣及紅磡宣傳,未因選情被看淡而放棄,唔知今次補選住埋劏房,又試過奇裝異服宣傳,得票會唔會有機會達總票數嘅3%,唔使被沒收5萬蚊參選按金呢?
其他參選人當有李卓人、馮檢基、陳凱欣及曾麗文。
九西補選●明天投票
http://bit.ly/appledaily1125