【新增動新聞】
皇家馬德里喺星期三嘅西甲快車主場迎戰貝迪斯，坐完波監嘅王牌球星基斯坦奴朗拿度（C朗）勢將復出。

C朗因為喺對巴塞隆拿嘅西班牙超級盃首回合兩黃一紅被逐後推球證，總共被罰停賽五場，經過咗西超盃次回合同埋四場聯賽，已經坐完五場波監嘅C朗可以喺星期三對貝迪斯嘅西甲候命。

皇馬星期日作客以3:1擊敗皇家蘇斯達，喺西甲終止咗兩連和，球隊星期一即刻復操備戰對貝迪斯嘅比賽，C朗亦有參與操練，但迪奧靴南迪斯同丹尼爾卡華積就只係喺健身室訓練。另外，之前有傷在身嘅賓施馬同高華錫就繼續恢復當中。