大時大節想𠱁身邊人開心，都唔好搵小動物較飛喎。漁護署動物管理（發展）科高級獸醫師周嘉慧（圖）同八方講，近年漁護署接收嘅貓狗數字雖然有遞減趨勢，但部份人仍然喺未經深思熟慮下買寵物，仲有年輕人以動物為禮物送畀他人，行為唔多負責任。
佢話呀，年輕人若然喺未有心理準備下收到寵物做禮物，有機會因經濟能力、時間、學業等原因，導致寵物流落街頭。
被遺棄嘅動物如果未絕育，仲會增加散播致命疾病，如傳染性花柳腫瘤、疱疹等風險。漁護署特別為此喺明年起加強宣傳同推廣，包括增加中小學講座數目、1月亦會舉辦展覽教育市民，唔好亂送貓狗博佳人歡心。