雷神要贏馬，神仙都擋唔住！第三場雷神贏完1.6倍大熱何廐「騰煌」未夠喉，第四場四班一哩，隨即再贏鄭廐「過關勇將」，跑完上半場已經起孖領先騎師王。
「過關勇將」3.7倍都係大熱掄元，跑第二係潘頓操刀的次熱「有意思」，9.1倍大熱Q就此開出。「有意思」上次跑沙田草地配女將蔣嘉琦，罕有地大漏閘，甫起步已注定輸掉，包尾返嚟都輸唔遠，呢鋪操好轉戰快活谷潘頓騎番，排12檔一起步已經火速切入帶頭，沿途慢放主宰步速，走勢暢順自然，潘頓騎功與嘉琦比較，確有重大分野。
今場眼看「有意思」直路走甩贏得之際，雷神騎住全場最輕磅的「過關勇將」沿欄直上一步不蝕，成功衝贏「有意思」勝出，令潘頓仲未可以打破個人今季谷戰齋缽，而「過關勇將」是自2014年2月贏馬後，相隔20個月才再捷。今場第三名係半冷門「金叻星」，跑第四係由雷神上完名匆出換楊明綸的「加州卓越」，四重彩每注派一萬九千幾。
「過關勇將」馬主包括恒生銀行前一姐梁高美懿，但她這晚沒現身，由丈夫梁承達主持大局。鄭俊偉指出，今仗專登一早卜定莫雷拉騎，加上有輕磅之助，才可力壓對手僅僅勝出。鄭俊偉好坦白咁講，如果下仗沒有雷神，恐怕連捷機會很渺茫了。練者又指此馬轉入其倉口已一年多，曾嘗試許多方法為這匹轉倉馬建功，很開心今仗終於有突破，並感謝馬主滙利團體給予耐性。