之所以話「男人四十一枝花」，男人到咗中年仍然可以好有魅力，唔使好似啲女人咁，死keep爛keep都保持唔到青春。土耳其門將羅士圖列巴雖年屆35，未到「一枝花」嘅年紀，不過佢前日對克羅地亞一身披頭散髮，直頭係欷歔中帶點滄桑嘅打扮，加上撲救12碼嘅雄姿，就真係體現另一種「型佬」嘅風味。好一個富傳奇色采嘅門將！
我求大俠同其他球迷一樣，都應該對02年日韓世界盃嘅羅士圖列巴印象最深刻，當時佢將佢把烏黑柔亮嘅秀髮紮條馬尾，仲為咗免被陽光曬住影響視線，喺眼底下搽到花面，十足《盜墓迷城》嘅古墓守護者一樣，直頭係去打wargame咁款，當時真係引死唔少師奶。
今屆歐國盃羅士圖列巴原本諗住去瑞士同奧地利shopping，點知廸米雷無厘頭領紅停兩場，搞到羅士圖列巴無啦啦要出場把關，令球迷可以懷緬下呢位門將嘅身手。雖然羅士圖列巴比起6年前個樣真係老咗，同埋少咗用護髮素，啲頭髮又黃又霉髮質又差哂，仲披頭散髮成個乞兒咁，不過唔好理，佢臨完場救咗達里祖史拉個罰球，真係仲有料到㗎！