今日沙田馬場在港初出馬，原本只有第七場呂健威馬房「百勝龍」能打響頭炮，但到第九場三班1200米草地，蔡約翰旗下、馬會名譽董事榮智健擁有的「西方快車」也來湊興玩即食，後駒單Win及組合獨贏A1，分別派53及30.5元。

四歲靚仔馬「西方快車」夥拍雷神莫雷拉後發先至，沿途守第九、第十位，末段追上輕勝個半馬位，姿態輕鬆到好似晨操咁款，本身連同澳洲三戰全勝未逢敵手。莫雷拉跑完呢場之後，這天分別勝出「精彩時機」、「喜悅繽紛」、「電子鳳凰」、「世澤之星」及「西方快車」，盡領風騷。

養馬多年的榮智健近年在商界趨低調，反而重新積極養馬，目前有「東方快車」、「南方快車」及「西方快車」三匹現役生力軍。當中「東方快車」有份跑今年打吡，並於日前婦女銀袋三級賽跑第三，而「南方快車」這天於第六場在港初出由雷神大熱倒灶。「西方快車」則完全唔同，贏到當成棚三班馬冇到，造就榮智健賽後和老友任志剛有得拉頭馬。

雷神在港第11次一日五捷或以上，個人今季累積39Win，拋離最接近排第二的潘頓多達20Win。呢場二至四名順序為「閃耀鑽皇」、「萬事欣」及「多多勁驥」，四重彩派九萬九千幾。