中西區區議會東華選區嘅居民又有機會投票嘞，因為原本嘅當區區議員民建聯蕭嘉怡「離棄」選民，轉跑道去咗做政務司司長嘅政治助理，出缺議席會進行補選。民建聯當然想力保不失，民主派亦決意同佢哋鍊過，聽聞民主黨內部醞釀曾參加過兩次中西區區議會選舉、喺中西區大嘅名校女生伍凱欣（Bonnie）上陣。

今年34歲嘅Bonnie喺名人搖籃嘅聖心畢業，係前政務司司長陳方安生、公民黨立法會議員陳淑莊嘅師妹，Bonnie由小學開始已經讀嘉諾撒聖心學校、中學就喺嘉諾撒聖心書院，讀足11年，喺中學時有玩女童軍同聖約翰救傷隊，似乎都係外向開朗型女仔。

雖然選過堅摩、水街兩個區，但住過中西區多個地方嘅Bonnie，嚟緊或會挑戰嘅東華選區先係佢真正長大、居住嘅地方，「我細個係住普慶坊...我住過中西區唔同嘅地方，當區區議員都係民主黨，包括阮品強、何俊麒、甘乃威。」

讀完副學士，Bonnie去搵工，第一份工就係應徵民主黨嘅地區助理，當時2006年，負責見佢嘅係民主黨中西區資深區議員鄭麗琼，之後由另一區議員甘乃威再見一次，咁佢最後做咗邊個助理？答案原來係李柱銘，因為當時李柱銘仲係港島區立法會議員，Bonnie就係呢位創黨主席嘅中西區地區助理。聽民主黨內部講，唔少人當時都覺得Bonnie係醒目女、幫得手。

Bonnie其後亦喺理大讀社會政策及行政學士，09年畢業，佢話本來諗嚟住做社工，但擔心一筆過撥款會搵唔到工，所以唔讀社工讀咗呢科。而做咗四年民主黨職員後，2010年，Bonnie喺民主黨風雨飄搖、畀人不斷批評嘅日子入黨，翌年代表民主黨出戰區選，對手係民建聯，最終高票落敗，2015年，Bonnie跳去水街再戰民建聯，同樣高票落敗。嚟緊Bonnie好有機會三戰民建聯，難怪Bonnie都話係宿命。有冇信心？Bonnie話，希望以往打下嘅地區居民基礎可以幫到自己啦！