Wyman黃偉文今次主動搵啲佢想合作嘅人填詞，仲係instagram話「非前排歌手」(即係頒獎禮唔係坐前排嗰班紅歌星)佢都會主動央求。其實係咪覺得呢行有啲歌手唱得好但被忽略？Wyman就坦言：「真係有㗎，佢哋可能未必遇到好機會，同埋好嘅歌，我哋呢個團隊負責歌詞，其他環節可能未必幫到手，但至少我哋可以主動出擊，睇吓可唔可以幫到啲忙。」係咪想幫埋樂壇，因為o依家好少人聽歌？Wyman話：「少人聽歌只係一個講法，其實冇方法證實呢個行業好快死亡，行業死唔死更加要出力做，唔理行業大氣候係咪夕陽，做好自己嘢先。」

Wyman話佢哋幫Sherman係因為唔抵得：「最近睇新聞，碧街7-11劫案流出嘅監察錄像之後，我十分唔舒服，所以鍾舒漫呢個project，與其話企圖復興廣東歌，不如話我哋更想喚回香港呢個地方人同人之間主動互相幫忙嘅風氣。點解香港人路過唔幫人？我睇到喊，行過一百次攞埋手機出嚟，點解唔做啲嘢幫人？起碼我哋行業裏面可以做到主動出擊，慢慢改變世界，希望係長遠，繼續有情投意合，會主動出擊合作。」

而Sherman對於Wyman團隊嘅主動幫忙，感激話：「我都好真心講，其實都幾百感交集，因為入行至今盡力做好自己，冇諗過到底有幾多人留意自己，成日希望將好嘅嘢帶畀聽眾，係自己一直以嚟做嘢宗旨，今次同Wyman呢個咁得意喺健身房碰上，對我嚟講都特別感動，加上佢嘅團隊，其實有好多好好訊息，有時只係音樂我唔知點展示出嚟，相信喺佢哋筆下，我幾有信心全部變得活生生，其實咁已經好大支持，我會畀心機錄好每一個音。」