美國國會參眾兩院外交委員會終於受理《香港人權與民主法案》，而且仲要係加辣版，好多政界中人都估唔到美國國會個《法案》修訂版去到咁盡，基本上中、港所有官員同差人都可以跌入日後制裁名單。有民主派人士同八方講，其實搞到美國國會去到咁盡，香港班死唔認錯、仲成日當自己好威威嘅克警「應記一功」。

呢個民主派話，其實北京喺美國嘅反游說攻勢好厲害，但北京冇諗過佢哋力撐嘅克警，嗰啲打到示威者頭破血流同濫暴嘅鏡頭日日喺美國主流傳媒出現，觸動好多美國人，當然亦包括參眾兩院議員，如果主流民意係咁，《法案》修訂版又有乜可能唔加辣？

網民：唔數吓打死幾多人？

不過克警似乎唔知大件事，前日仲喺facebook抽反送中水，學網民個7.21事件幾多日未拉人文宣，出個改圖「和你數」6.9至今拉咗幾多人，即刻俾網民洗版式狂鬧，話佢哋又唔數吓打死打傷幾多人？有民主派人士同八方講《香港人權與民主法案》講明可向濫暴虐打人士制裁拒發簽證，仲係禍及妻兒全家，班克警有冇諗過，即使仔女日後幾叻，就係因為佢做過違反人權嘅事，即使哈佛收咗仔女，隨時因為佢而不獲發簽證去美國讀書，累埋仔女前途，到時後悔就太遲。