噚晚第三集《衝上II》完場之十五分鐘，陳法拉飾演嘅何年希，示範了何謂「哭不出來」——要等到一年之後，先發覺當年不辭而別嘅男友，原來之前靜雞雞放咗隻大大粒鑽戒，放落法拉日夜相伴、帶住佢四處流浪嘅望遠鏡裡面。悲從中來嘅法拉，發現一切已經太遲，自是傷心欲絕。但無論點樣谷、點樣掩面、點樣踎喺地，都係一滴眼淚都冇。有網民話，法拉呢啲，叫做欲哭無淚。

的確，有眼淚唔代表一切，唔代表眼淚越多傷痛越深。但係，今晚第四集頭十五分鐘，吳鎮宇已經用其超班演技，證明乜嘢叫做欲哭無淚。

呢場戲係講，Sam哥一直想整番，當日同Zoe一齊食過嘅蛋糕嗰種味道。無奈Sam哥又唔得成份係幾多，於是一整整十幾個，逐一去試。終於，俾Sam哥撞中了，味蕾聯繫上記憶深處，關於Zoe的一切，亦一下子由喉頭化開。Sam哥鬆了一口氣，一口一口吃著，一邊行到窗旁，就想起，戴著紅帽、長頭髮的Zoe，兩人喺公園裡笑笑鬧鬧，Sam哥仲孭住Zoe，感受到對方的重量和愛。

回憶中，兩人清晨起來，一齊整蛋糕、就係想搵番嗰種味道；然後，鏡頭一轉，Zoe已經病重，Sam哥停職陪伴住佢，Zoe就同佢講:「Sam，你放咗好耐假0架喇，係時候要返去0架喇。」當時Sam哥就答應Zoe:「等我整番全世界最好食嘅蛋糕俾你食，我一定返去飛0架。」

鏡頭變成黑白，時間回到現在，Sam哥深深吮著製成品的味道，百般滋味在心頭。只見Sam哥喉頭輕微抽搐，下巴和嘴唇稍稍顫動，眼皮垂下，想要哭了，然而Sam哥沒有哭，只是深深抽了一口涼氣，抬起頭，舐脷，回味蛋糕嘅味道，喉頭再抽搐了一下，望著窗外，Sam哥說:「我知0架喇，我嘅假，已經放完喇。」說罷，再合上眼，仰首，沐浴於陽光裡，像得到Zoe最大的安慰一樣。

沒有眼淚。這就是演技。