陳詩慧噚晚喺旺角戶外搞小型音樂會，獲雨僑、周家怡、楊淇捧場，雨僑有份主演嘅新戲《西謊極樂：太爆太子太空艙》喺附近搞慶功宴，所以特登到場打氣，而周家怡就幫手做大會攝影師。

詩慧都一樣有份拍《西》片，仲首次做埋配樂兼唱埋主題曲一腳踢，佢笑話：「好似自己老公咁，都估唔到我咁百變，下次可以試吓做男人，啲人都話我半男不女。」佢又講到電影主題曲，雖然係廣東話版，但喺大陸上時都有人讚好聽：「廣東歌市場已經去到嚴重嘅地步，歌手要做其他嘢維生，好難搵食，睇我瘦到咁就知，唱得好嘅歌手都要返大陸做嘢，真係要反思，港媒體、歌手、唱片業，應該聯手為廣東歌做番啲嘢，咁落去遲早冇咗廣東歌。」

詩慧慨歎連好有才華嘅歌手都要返大陸：「所以我陳詩慧都要食s……，大家都知plug係乜遊戲玩法，老闆都有大力推動，但o依家形勢好似轉晒形咁，氣氛文化需要偏向騎呢，至會有人留意同點擊，我會堅持做廣東歌，因為廣東話至係我嘅母語。」

另外，雨僑回應同羅力威嘅婚事，佢話：「o依家努力緊，細節場地要搞，問緊唔同人嘅意見，細節會交畀佢講，因為佢講嘢好清楚。」