【問過歐鎧淳未】胡子彤操到爆肌夠吸睛 潘燦良主動加咀戲
潘燦良胡子彤
胡子彤同潘燦良繼電影《逆流大叔》後,最近合作為金管局拍廣告,再同前輩潘燦良合作,子彤話:「再次感受到燦哥演戲同演喜劇嘅功力,佢一舉手一投足都係演緊戲,喜感好強,好值得學習。」
兩位「大叔」喺廣告中演難兄難弟,一齊借錢被追數,有幕劇情講子彤喺餐廳嚇暈倒地,潘燦良拍醒佢,點知潘燦良臨場加戲,幫子彤人工呼吸。佢哋又喺屋企着住睡衣、孖煙通,互掃背脊,又喺茶餐廳肉緊摸手仔,好有hehe曖昧feel。
好多後生仔都冇儲錢習慣,至於90後嘅子彤,就有自己一套儲蓄心得,佢話:「我好鍾意買衫褲鞋襪,雖然唔係買貴嘢,只係買好襯、多元化嘅嘢,不過唔算太儲到錢,所以當我有一大嚿錢嘅時候,就會用嚟投資,o依家有間威士忌酒吧,嚟緊會開台式鐵板燒餐廳。」
作為運動員,子彤計劃下年考健身教練牌,再同朋友開健身室,佢話:「本身自己好鍾意做運動,之前做運動員時愛上健身,可能因為細個好瘦,o依家就貪靚想身形好睇啲,同保持健康形象。早幾年開始玩gym,有段時間做得好密,但早排因為拍戲冇時間做運動,又成日食宵夜,o依家積極操fit,同唔食咁多嘢,嚟緊一月去馬來西亞拍戲,可能要除衫,所以要再積極啲。」
問到有冇同運動員女友歐鎧淳一齊節食?子彤話:「佢因為運動量好大,要食好多嘢補充,不過食唔晒都要我食,我好易變肥仔。」
精選娛聞,喺晒《娛果》
http://fb.com/appledailyent