數碼廣播變化真係好快,奧運殺到埋身,無綫電視前日失驚無神公佈話8月8日推出互動電視服務,透過互動機頂盒睇高清翡翠台同J2台,按遙控器可以睇到天氣、恒生指數、新聞提要、奧運獎牌榜,遲啲仲可以買嘢、投票㖭。
無綫𠵱家先講,唔少人已經買咗機頂盒,但市面唔係隻隻牌子都支援互動功能,買着支援唔到嘅真係激鬼死。影音專家Alan話,最基本要有無綫選用嘅MHEG5互動制式嘅機頂盒先支援到無綫嘅互動節目,不過,有MHEG5功能但未獲得無綫認證嘅機頂盒,又唔保證可享互動服務,「最壞情況係接收唔到,或者出嚟嘅中文字亂晒碼」。Alan話,𠵱家只有OLEVIAZMT-620FTA得到無綫認證,如果仲未買機,可以考慮呢部;要揀其他牌子,買嗰陣一定要試清楚。