港大民意調查，立法會議員民望，無論親中保皇，定係反董亂港，全線報跌，連平時冇出聲、冇立場，專責扑槌指揮交通嘅主席范太，都跌成五巴仙咁多！
咁就證明，啲「民意」意向好難捉摸！例如港版哲古華拉咁，當初選民選佢，就係貪佢敢紮紮跳反枱！今次民意跌，又有佢份！咁又係嘅，長毛入咗立法會，表現太過斯文，棺材未抬過一副，只係識得辯論，又唔見佢個袋裝隻馬騮，入嚟立法會放出嚟，范太喝佢坐低，佢就乖乖哋坐低，毛主席話頭：革命不是請客吃飯，而毛主席的好學生長毛表現，十足《大長今》嘅一名煮飯婆咁，點夠喉呀！
媾鬼妹，百日先至得兩件咁少，對於土共維園阿伯，長毛又未能伸張民族大義，洗雪國恥，成績差強人意，真係裏外不是人，所以我哋特區哲古華拉就難免失咗少少分，想隊番上去，喺立法會同蘭桂坊呢兩條戰線，長毛就要加吓油嘞！