由王貽興、劉翁自編、導、演ViuTV新劇《VR驅魔人》本月底推出，今日劇中演員在九龍灣舉行宣傳，包括有詹瑞文、錢小豪、劉浩龍、陳國邦、羅敏莊、鄧月平等。

劉浩龍傳同容祖兒分手，心情冇受影響，在台上同對手樓南光一齊宣傳時，被對方迫供講感情事，師兄亦腦筋急轉彎解答話：「同你感情幾好。」咁其他呢？「梗係好啦全部都睇ViuTV。」感情係對一個人喎？「一個人梗係對媽媽啦。」

受訪時劉浩龍笑面迎人透露今次角色係重演八年前電影《飛砂風中轉》角色，覺得相比之下有所進步。現時感情狀況？佢話：「舊年至今，目的一樣做好工作，唔好話我做宣傳，我4月開騷瘦咗好多，近半個月好辛苦，每日都操練，發夢都諗住食嘢，精神壓力好大，加上好耐冇做騷，今次積極做好令人知道我係歌手，去年我比較愛電影，今年會努力話畀大家知我鍾意唱歌。」並指沒有看近日報道，不想影響心情，冇飯食已經好忟憎。

祖兒傳短訊打氣？劉浩龍話冇乜朋友短訊佢，現時狀況係咪分咗手呢？佢話：「呢個環境大家好支持大家，最緊要努力工作， 近排做咗三十幾個訪問，我都唔想講感情事，希望大家專注睇到我努力，工作感情嘅事暫時唔回應，希望大家體諒。」係咪冷靜期未解決到？劉浩龍話：「互相支持大家，佢好我開心，我好佢開心。」兩人似乎夾過口供，劉浩龍否認，並話：「大家有自己答案，呢個係我自己思想感受。依家心情好正面，為演唱會減咗24磅。」

有冇請祖兒睇騷？劉浩龍：「好多朋友都會嚟睇，我擔心買嘅飛唔夠。」有網民批評今次分手事件是劉浩龍為演唱會宣傳， 佢話：「我可以百分百話完全唔會，之前都做咗三十幾個訪問，我已經盡力宣傳演唱會，呢個年代唔需要咁做，咁肉酸，靠自己努力積極啲啦。」此外，楊生話希望愛錫祖兒嘅人唔好有目的，劉浩龍表示不回應。

鄧月平開劇時每日有利是收，見到片段中鄧月平有不同造型，佢話劇中有Sailor Moon、清純良家婦女、浴袍look等等 ，不過只得一兩場戲有鞋著，大部分時候都赤腳， 又話角色係以為自己係鬼好神怪，實質係咩就叫大家自己睇。

精選娛聞，喺晒《娛果》
http://fb.com/appledailyent