13屆冠軍騎師韋達今季開局認真慘不忍睹，經過四個賽日後，唔單止未能開齋，就連跑入前三名，十三少都未能做到，最叻都係得兩次梗頸四。

剛周三（13日）晚谷草第四場賽事，十三少賽後被競賽小組抽秤，話佢直路策騎「肥仔」有空位唔上，而相關的賽後報告原文是「儘管小組同意『肥仔』起初曾在『快馬奔馳』與『綫路神駒』之間無路可上，但仍然告誡韋達，小組認為『綫路神駒』與『財神』之間有足夠空間讓他繼續力策『肥仔』至終點。」

呢種陣上表現令韋達賽後再一次，被馬迷指為用「安全至上」跑法完成賽事。

事緣當時「肥仔」喺最後100米本來有空位上，但前面嘅「快馬奔馳」外閃，阻擋十三少座騎去路，之後佢就移去「綫路神駒」與「財神」之間嘅空位，但因為覺得空位太窄，所以索性收韁唔騎。

不過小組就唔係咁諗，話「綫路神駒」與「財神」之間嘅空位絕對夠「肥仔」過，但考慮到案發時間已接近終點，而「肥仔」又輸得遠，所以今次放過韋達一馬，只係告誡佢了事，冇向佢採取進一步行動。

今次雖然走得甩，唔使停賽或罰錢，但係俾馬主或練馬師見到呢種偏向錫身的騎法，甚至令佢哋覺得當事人但求安全返屋企，咁樣對當事人嚟講卻未必係好事。