當年今日
關於我們

【下體藏手榴彈】《巾幗梟雄3》邊有得鬥 強國抗日神劇Cult到爆

蘋果日報 2016/10/01 00:00

抗日神劇巾幗梟雄下體藏手榴彈

大台神劇《巾幗梟雄》拍到第三集就變咗重口味膠劇,話佢破格又唔係,話佢Cult又唔係,一言蔽之,畫虎不成反類犬。
要數Cult劇,一定要數大陸嘅「抗日神劇」,劇中人物可以徒手將人體撕開一半,女士嘅下體竟然用作收埋手榴彈,真係人唔笑狗都吠。
前「劉翔嫂」葛天演出嘅《一起打鬼子》,佢嘅角色「銀妹」去搵被日軍關押折磨嘅愛人,突然間叫對方摸自己個胸,之後再叫佢摸自己下體……喂!點解抗日會變咗AV情節㗎?哦,原來係喺葛天下體攞個手榴彈出嚟,同敵人一鑊熟。
另一套神劇《抗日奇俠》,一聽個名就知係攞正牌亂嚟啦。劇中角色徒手就輕易將日軍士兵撕開兩邊,唔講以為睇緊本地Cult片力王o添!
仲有「打飛機」情節呀!喂,唔好心邪呀,講緊嘅係將日軍戰機擊落呀。《永不磨滅的番號》劇中,一個士兵隨手掉個手榴彈上天,就可以將戰機炸毀。
例子太多,不能盡錄,大家有興趣就自己search「抗日神劇」啦,記得唔好飲住嘢睇喎。