全港首間兔仔主題Cafe，都開店接近兩年，今天才有機會到此一遊，在這玩咗一個下晝，兩個小朋友邊食邊餵兔仔，真係個幾好的親子好去處。Cafe就位於銅鑼灣謝斐道，就喺世貿斜對面，望上去就好多落地玻璃飛髮舖，望上三樓就係見到。

之前兩兄妹聽到今日會去兔仔餐廳，就已經開心到不得了，起初聽見仲以為只係甚麼裝飾之類的，不知道原來是真兔仔。沿扶手樓梯一層一層行上去，上到三樓餐廳門外有張好似驗眼的圖像。大家記住上嚟之前電話預約，餐廳內地方不算大，但尚算可以坐接近30位客人，入場記住先除鞋啊。這裡住了大約10多隻兔仔，還放了很多Board Game俾大家玩玩。職員會不定時從籠中帶出兔仔，放牠們周圍跑跳，或者放在籬笆內休息，俾大家餵飼。

不過大家都要注意現場守則，唔可以抱起兔仔，只可以輕輕摸佢哋。這裡有兔費WiFi提供，仲有兔公仔同頭飾提供，俾大家可以戴住同真兔仔打咭。呀芊一見到兔仔已經走埋去同佢玩，都唔記得咗自己係嚟食嘢開餐。在場朋友可以有兩種選擇：第一，一小時用餐體驗，每人頭最低消費$50；第二，不限時用餐體驗，每人頭須點選指定套餐（$98-$168）。

我哋點了兩個$98套餐，再加兩個$128套餐，讓小朋友成個下晝玩都夠本。食物質素正常，味道可接受。但對小朋友嚟講，佢哋關心的只係麥樂雞同薯條啫，食食下還會無啦啦有兔仔跳過嚟。我問過店職員，原來唔可以每一隻都同時放出嚟，因為佢哋都好有性格，好似人咁會分黨分派，某幾隻唔可以放埋一齊，店員清楚哂佢哋每一隻兔仔既名字跟性格。最低的兔籠係唔可以打開，大家要留意喔！

每個套餐已經包了一杯兔仔小食，若果你選擇只留一個小時，都可以另買一杯$18來餵兔仔。兔仔唔食紅蘿蔔㗎，只愛食香草。每一隻都超萌，只要你餵佢，佢就乖乖的留低慢慢嘆。睇見個個小朋友都開開心心咁周圍追住兔仔餵，食客都會因為兔仔一齊傾起計上嚟，呢種氣氛都幾好幾Warm！兔仔全部都跳跳紮，如果唔係有草糧餵佢，都真係幾難可以俾你摸到佢。餵到冇哂糧草，就開始玩起Board Game上嚟，在這差不多留咗兩個半鐘先離開。

呀劍評語: 絕對係一個好好的親子地方，有得食有得玩同餵兔仔，大人細路都好開心。

特別溫馨提示：場內不可大叫、喊、跑、跳，不可有任何影響兔仔的行為！希望大家能愛惜小兔，兔仔是生命是寵物，不是玩具！請用眼去觀察、用心去感受兔仔的可愛之處！

Rabbitland Cafe
地點：銅鑼灣謝斐道530號3樓
營業時間：1300-2130(星期一至星期日）
預約電話：5281 0280
電郵：[email protected]
網址： http://www.rabbitland.com.hk
Facebook： https://www.facebook.com/rabbitlandcafe
年齡限制：3歲或以下恕不招待，敬請見諒；店內必須穿襪，或於店內購買$10/對。

專欄作者簡介：
呀劍萬帥
最愛親子本地遊、拍下孩子喜與樂、分享生活日常事！

Facebook link：
https://www.facebook.com/kimfamilytravel