當年今日

求驗客手記:買費爾神射手 咁快玩完! - 求驗客

蘋果日報 2008/06/08 00:00


主辦國瑞士好黑仔!除咗喺揭幕戰0:1輸俾捷克外,隊長兼射手阿歷山大費爾未踢完半場就因傷被調離場,餘下賽事都唔踢得,認真慘!不過慘嘅又點止費爾,買咗佢神射手嘅球迷未完半場就要搣飛,認真喊都無謂呀!
每屆大賽,球迷都會睇高主辦國一線,瑞士呢班波年輕有活力,應該會喺歐國盃有啲作為,所以買神射手點都會留意吓費爾。仲有,費爾近期做埋隊長;加上又啱啱破咗國家隊入球紀錄(35球),喺咁多利好因素支持下,佢喺足智彩嘅神射手賠率由開飛嘅50倍落飛到賽前嘅40倍,都有唔少人捧場!
膝傷玩完提早搣飛
揭幕戰對住捷克,費爾真係交足功課,遠射、入楔都差啲製造到入球,睇嚟呢個40倍神射手真係有啲計喎。可惜,臨完半場前3分鐘,費爾同基謝拉一次唔算激烈嘅碰撞,就令到佢左腳膝頭嘅韌帶撕裂,證實咗要提早拜拜。之後費爾撐住枴杖行出球場,都忍唔住流下男兒淚,睇到人心都噏埋!
不過賭仔始終都係現實嘅,費爾係慘,但買咗佢神射手嘅波友會覺得自己仲慘,話晒費爾成個歐國盃踢得42分鐘咁大把,就算你最後拎唔到神射手大家唔會怪你,但係都俾大家嗌多幾場呀!
消息傳開之後,費爾嘅神射手賠率已經冷到9,999倍,同封咗盤其實冇乜分別。
我求大俠就諗起我哋某位名家,佢喺歐國盃前滿心歡喜咁扒冷小注買費爾做神射手,大家仲見到佢將張飛釘咗上告示板度,𠵱家真係留番張飛呻鼻涕算啦!
empty