剛剛日馬潘頓隻「仁愛之星」同史卓豐隻「歡樂一生」，喺轉彎入直路埋身肉搏爭位，最終兩敗俱傷。睇呢場「仁愛之星」嘅走勢，根本必入三甲，結果大熱門跑梗頸四，買咗嘅馬迷都咪話唔激氣。「仁愛之星」今季唔係影相輸少少，就陣上有擠阻意外，賽後仲驗到氣管多血，真係正牌失運馬。

潘頓同史卓豐陣上互不相讓，潘頓盡力搏位搏馬，史卓豐亦冇放水輕易讓位，兩個咗爭勝態度都值得鼓勵，但係啲火遮眼動作就真係要戒。呢次爭位鏡頭其實非常礙眼，差啲已經釀成墮馬意外，若然真係有騎師落樓，睇怕競賽小組賽後唔會淨係告誡潘頓兩句了事，史卓豐早前已經有前科，唔理其他人馬嘅安全，被重罰亦合情合理。

潘頓呢排贏馬停不了，鋒芒完全蓋過雷神，對比季初經常被質疑走死位，跑嚟漫不經心，呢場「仁愛之星」就可以睇到潘頓要搏命時，攞位可以幾咁狼死同誇張。潘頓嘅騎功唔使懷疑，但係佢策騎嘅EQ真係仲要提升，不時都有啲刻意封死對手，但又損人不利己嘅惹火行徑，其實呢啲多餘動作可免則免，騎師首要責任係為座騎爭取最佳名次。

平情而論，潘頓確係目前唯一有實力威脅雷神嘅騎師，可惜佢嘅表現太過飄忽，表現落差太大。希望佢下半季能夠維持呢段時間嘅上佳表現同鬥志，改變馬迷認為佢唔太可靠嘅負面印象。

阿Joe