李八方online︱6月飛霜？天文台「預測跌至0°C」 揭app出錯漏夜搶修
蘋果日報 2021/06/14 08:58
天文台天氣李八方online
如果真係好似天文台個app講，黃竹坑跌到0度，而又有其他氣象條件配合，真係可以「6月飛霜」㗎。
雖然今年6月某幾日，想去旺區行吓街都唔得，但八方相信喺大是大非之日，就連上天都會顯靈，「提醒大家」。好似6.4前夕，TVB天氣報告如常引述天文台每小時拉平均數據，真係報出6.3嘅相對濕度介乎64至89%。但假如八方同你講，而家連天文台app都一齊「顯靈」，預報有「6月飛霜」，你又信唔信？
天文台個app擺烏龍，竟然預測黃竹坑氣溫，由6.15晚上11點嘅28度，急跌到6.16凌晨2點嘅0度。MET WARN天氣預警Telegram截圖
八方今次冇呃你，絕對有圖有真相。民間氣象網站「MET WARN天氣預警」喺Telegram出po，仲有cap圖為證，話天文台個app預測黃竹坑氣溫，由6.15晚上11點嘅28°C，急跌到6.16凌晨2點嘅0°C，即係3個鐘暴跌28度。雖然正常人一睇，除咗嚇一嚇，都知道係擺烏龍，但如果真係跌到0°C，又有其他氣象條件配合，真係可以「6月飛霜」㗎。
八方睇番資料，同類嘅出錯3年幾前都試過。嗰陣2018年1月底正值寒流襲港，明明天文台網頁只係話市區跌到9°C，但天文台個app就顯示，尖沙嘴氣溫會跌穿冰點去到-1°C，3個鐘後再回升到19°C。不過嗰次「冰火交融」嘅程度，都比唔上今次3個鐘急跌28度咁誇。
2018年1月，天文台個app都試過錯誤顯示，尖沙嘴氣溫會跌穿冰點去到-1度，3個鐘後再回升到19度。
但講開又講，天文台近排「蝦碌」次數，又真係密咗啲。例如6.11，明明只係1號風球、黃雨同雷暴警告，但天文台煞有介事用app出push（推播通知），叫「市民請盡快到安全地方躲避」，俾網民嘲笑係咪「外星人打到嚟？」又例如5.31，天文台出稿想寫10毫米雨量，但寫漏個毫字，結果變成多1,000倍嘅10米，完全證明咩係「差之毫釐，謬之千里」。
6.11明明只係1號風球、黃雨同雷暴警告，但天文台竟然用app出push（推播通知），煞有介事叫「市民請盡快到安全地方躲避」。
雖然今次「蝦碌」都係得啖笑，但始終都係出錯，同樣要認真正視。八方夜晚10點半問天文台，今次出錯原因係咩？除咗黃竹坑，仲有冇其他地區嘅用戶受影響？天文台初步了解之後，凌晨2點覆電郵畀八方，話個app處理「電腦自動分區天氣預測」數據嗰陣出咗問題，顯示黃竹坑同其他個別氣象站嘅資料受到影響，而家已經修復好喇。
-----------------------------