政府庫房水浸,幾乎全民受惠,馬會足智彩可能知道港人水頭充足,聽聞佢哋下個月連日本乙組聯賽都開埋,等球迷冇乜世藝,做番多啲慈善回饋社會,誓要谷大來年度投注額。
07/08年度足球博彩稅有28.5億,只比上年度多不足2%;今夏歐國盃冇英格蘭,就算京奧有足球賽,睇走勢,下年度足球博彩稅收亦唔會有太大幅增長。主因可能係唔少香港球迷賭波同睇波,已因市場太濫變冷感,扭開電視見晨早場銀河踢水準極低嘅四角賽,又賭幾百蚊;夜晚深夜播葡超,又玩幾舊。英超還有一定吸引力,歐國盃連英格蘭都冇份,波友到時咪又係例飛支持。
睇歐國盃唔馨香,教嗰個可能都咁諗,奇連士文同尹巴士頓呢類星級年輕教練,手執德荷兵權;前者來屆教拜仁,後者歐國盃後返荷甲領褪色班霸阿積士,球會級賽事掛帥,唔單係波友想法。日乙時間好,足智彩開盤大員睇怕快將開售澳洲、阿聯酋同卡塔爾聯賽,誓要滿足香港病態賭徒!
文:蘋果波神
英超波癡有一個心願,5月話你知!
http://hk.myblog.yahoo.com/appleballmen/