每人一小步，就是社運的一大步。阿Kin和阿Lo兩口子從事影像製作，六月九日參加完「反送中」遊行後，民意換來政府漠視，更覺火上加油。「啲人覺得遊行好廉價嘛，咁不如做多啲。」他們是自由工作者，六月十二日罷工上街冇難度，但他們決定多行一步，製作罷市海報派發給商戶、貼在門口以明志，「做咩都改變唔到（現狀），所以好似盲頭烏蠅咁，做到乜就做乜。」]
事緣六月十日晚，阿Lo在連登遊蕩，偶然看見劉細良的網台節目《三不館》。她不是網台常客，但一聽就覺得「有得做」，「佢話香港係『得OL得天下』，整啲嘢俾佢哋打卡，等大家認住罷市的舖頭，回頭幫襯；令商戶唔好覺得會蝕咗一日生意。」她急call做平面設計的朋友阿龜，即晚完工。翌日兵分幾路，拿著網上流傳的「罷市名單」在各區洗樓，也來不及事先打招呼。商戶的反應正面，「多謝呀！」「你哋咪要跑好多間？」印刷店亦堅持不收費，「炮台山的彩虹影印好好。印咗成一百張貼紙、一百張A3海報。我哋硬塞咗一百蚊俾佢，成本都唔知夠唔夠。」另有網上版可隨意下載，自己海報自己印。
他們不是社運領袖，但大小社運從不缺席。「首先我唔想任何我識得嘅人會被送返大陸受審；其次就係， 以前文革做文宣嘅都死啦，我哋就係做文宣嘅。」一四年雨傘運動，阿Kin瞓街七十九日、阿Lo曾發起「給爸媽的信」，讓學生哥寫信給父母，講述自己不回家的理由，「嗰陣真係好熱血。」五年下來，二人自稱「灰咗」，但不甘就手旁觀，「歷史不斷重演，而我唔想再重演。有啲攰。問心，我都唔想攪咁多嘢，留喺屋企食吓飯、涼吓冷氣仲好啦。」「經過佔中嘅教訓，係咪可以flexible啲，唔使死守喺度?」「你知連登啲人幾勁，勁多抗爭方法。跟一個你覺得make sense嘅，可以做咪做，唔一定要衝要流血。」不幸的是，話未說完，便子彈橫飛添美道，金鐘再次硝煙四起。
記者:蔡慧敏
攝影:鄭樹清