上屆冠軍騎師潘頓，今季揀馬眼光非常獨到，開鑼日初策「勁無比」贏馬，其餘首次接手的馬「超能量」、「五陵霸」與「美麗日子」均入Q，還有「醒蹄飛」亦跑第三，唯一只有「芙蓉莊」跑包尾最失威。大致上跟住潘頓的選擇，不失為一條扶手棍！

本周三晚（12日）潘頓將與高伯新馬房合作，首次為「贏科超影」操刀，角逐四班一哩賽，翻查紀錄，上季至今這對騎練合作十次，成績一冠三亞一季，上名率達五成，尚算不俗。

9月4日潘頓曾親自試閘為「贏科超影」試大閘，沿途居中，直路移出望空，立即交出凌厲後勁，率先衝線跑第一，走勢譽滿欄邊。

「贏科超影」是四歲愛爾蘭自購馬，在當地勝出一場1400米兩歲處女馬賽，前季開始在港上陣，首季六戰交白卷，上季12月份於同程谷草1650米爆出34倍冷門開齋，今季首戰即攻贏馬路程，兼獲潘頓睇中垂青，演出隨時大有進步。