陳奕迅(Eason)近日喺內地太原開巡迴演唱會，點知又發生極不愉快事件，於12號當日Eason喺太原機場落機，微博開始傳出佢好多張喺機場黑晒面嘅相，之後好多人就喺微博鬧佢扮大牌添。

微博流出一條當時Eason喺機場達一分鐘嘅片段，有粉絲追住佢影相，有工作人員圍喺身邊嘅Eason就好明顯心情極差，行得好快，Eason邊行邊話:「對不起，是海關搞得我不開心，真的對不起。」之後有粉絲大叫:「Eason，你是最捧的。」點知Eason就停低用手指指住一位人講咗幾句嘢:「從下飛機開始就拍拍拍...(中間一句太細聲)這是太原給我第一個印象!」

有指Eason係因為一落飛機，好多海關人員要求佢合照簽名而不滿，中新網就報道，根據太原海關方面表示，當日Eason係下午4點20分落機，喺通關過程中，先後有工作人員對住Eason影相同索取簽名，Eason當時要求其中一名人員刪除手機入面嘅相，但就話海關人員「冇參與呢個過程」。