喺大台做咗26年綠葉嘅戴耀明，近排經常出現係各類廣告中，好似最近佢就Cosplay扮《一拳超人》嘅琦玉為遊戲商搞吓氣氛。其實佢近幾年都拍咗幾個廣告，好似貨車尾板、保管箱、地產公司、保險等，都幾好執。

捱咗咁多年，終於做到廣告明星，更難得係佢嘅廣告出現喺巴士車身。日前戴耀明喺街上見到架巴士，有自己嘅嘜頭廣告，影相留念係指定動作，佢仲貼咗喺微博，點知佢嘅留言都幾洋蔥。

佢留言寫住︰「我爸爸以前是一個巴士司機，很久很久以前…有一次佢講笑地說 :『衰仔，希望有一天，老豆揸的巴士會有你的廣告，等老豆可以喺巴士面前影張相。』…對不起老豆…當年未能趕得及完成你的拍照願望!!今天這個場景…希望在遠方的你能看到。」

原來佢爸爸生前係巴士司機，當年戴爸爸好支持佢做演藝呢行，但好可惜，佢阿爸早年因病離逝，家中係獨子嘅佢，同戴媽媽相依為命。依家佢捱到拍廣告，仲出現喺巴士車身，總算完咗戴爸爸嘅願望。

戴耀明今日接受《蘋果》訪問話：「其實係一個遺憾，唔可以同埋爸爸一齊坐呢架巴士，但係o依家感覺算係圓咗爸爸生前其中一個小小嘅夢想，不過人生就係咁喇，好多時都係時間配合唔到，有啲嘢一係快咗，又或者係慢咗，甚至乎係錯過咗，唯有再遲啲搵阿媽去影相。」戴耀明仲話諗住呢幾日同埋阿媽去影相：「本來諗住叫埋阿媽一齊喺巴士站嗰度等，睇吓邊架巴士有我嘅廣告，之後就一齊上車遊巴士河，跟住影張相，點知阿媽拒絕咗，佢話咁鬼熱，企喺個站度點等呀？等過幾日我自己再去試吓等一等，夾埋時間唔使阿媽等太耐！」

精選娛聞，喺晒《娛果》
http://fb.com/appledailyent