梁詠琪(Gigi)喺15年為西班牙籍老公Sergio生咗混血小公主Sofia，嗰陣Gigi專心相夫湊女，直到Sofia一歲，Gigi復出拍戲，不過產後復出第一炮，並唔係飾演佢最擅長嘅小品愛情，而係帶有同性戀意味另類題材嘅《骨妹》，Gigi懷胎9月，喺生產嘅過程，釋出嘅雌激素，令佢感情變得更豐厚。

講到《骨妹》呢套電影，Gigi話：「嗰時一接到劇本，仲係湊緊女，第一樣要離開屋企時間長，但係我又鍾意個劇本，因為個劇本係講緊一種感情，介乎友情同愛情之間，話我哋兩姊妹有個仔，係好有挑戰性，同埋啱啱做咗媽媽，第一部接唔係愛情戲，反而係講姊妹情，親情，人生有變化，對於『愛』、『情』係會有另一個層次嘅體會，所以我睇劇本嘅時候都睇到喊，覺得個角色好有挑戰性。」

今次Gigi飾演詩詩呢個角色，同同性密友嘅曖昧關係，引人入勝，現實生活Gigi又冇試過遇到類似故事？佢話：「好姊妹又好似好曖昧，我覺得等觀眾自己去領悟有冇同性戀呢一種愛意係裡面，我自己就冇發生過，我身邊係有呢啲女性嘅couple，我唔知佢哋感覺點樣開始，我未試過。」

Gigi說：「當兩個人之間都係好清楚大家嘅取向，當然無問題，戲入面我一路唔知道，唔清楚，一路以為係一種好單純姊妹嘅愛係裡面，當我離開呢個姊妹，冇諗過對對方嘅傷害同影響係咁長遠，最後返去故鄉知道佢對自己有種咁深厚情意結，嗰種遺憾同悔咎感覺，係好複雜，現實生活我無試過，但係我好似又好似明白佢嘅感覺，所以我好想嘗試下呢個角色。」