4位喺補選中當選嘅新議員，聽日就會喺立法會正式宣誓。繼區諾軒低調喺周一入伙，新同盟范國威今午都入伙新議辦。

重返議會嘅咖喱范，揀咗被DQ嘅姚松炎用開嘅905號室，位處民主黨鄺俊宇同街工梁耀忠中間。入伙前，咖喱范先要拎番張臨時議員證先入到大會，皆因之前有蝦轆，佢交嘅證件相用咗白色做底色，唔啱立法會秘書處嘅要求。

攞房後咖喱范就親自執拾佢嘅書、字同畫作及擺設，唔少字畫跟咗佢好多年，例如「民生無小事，民主要堅持」字畫、讀書時期嘅作品等。而除咗講政治同藝術，放喺議辦嘅書，估唔到連漫畫都有，佢話擺少少漫畫喺度，因為有時做嘢做到攰攰地睇一陣都唔錯。

議辦除咗要有書同文件，梗係最緊要有人，咖喱范話家陣仲埋緊班，一來立法會議辦仲有兩、三個空缺，二來佢要開番啲地區辦事處，又需要多幾位助理，佢心目中優先想請番被DQ議員嘅助理。但講到地辦就煩惱嘞，事關唔少平租嘅房署好位，早就被其他議員揀咗，於是佢得番捱貴租或同新同盟區議員嘅地辦合併呢兩個選擇。

《蘋果》沙士15周年系列網站，正式登場：
https://hk.feature.appledaily.com/sars15/