賭王何鴻燊與三太陳婉珍有二女一子，大女超雲及一對龍鳳胎超蓮及猷啟，超蓮在訪問中，多次提到母親陳婉珍時，都隱約透露媽咪成日訓示自己，而每提到賭王爸爸，就大讚係黃大仙，有求必應，可見三太是嚴母，而賭王就做好人角色。

問到超蓮會否覺得母親管教嚴肅、要求高，超蓮即笑言：「我阿媽好有氣場，比較嚴肅，我細個鍾意玩，最叻講大話，好無聊，想食粒糖都會講大話，同細佬行孖beat，兩個一齊做衰嘢，兩個一齊被發現，我阿媽細個會用籐條打會體罰，佢要我哋喺走廊舉書包，跟住懶醒拎晒書出嚟，舉個吉書包，跟住我阿媽經過發現我哋拎假嘅書包，佢會擺啲bible入去舉。」超蓮表示媽媽著重品德培養：「成績佢又唔係最緊要，最犀利係睇人嘅品格，啲老師啲成績表，佢唔係睇成績，係睇隔籬老師comments同評語，因為細個都幾搗蛋，通常成績好唔會聽書，我幾科成績好就唔聽書，我成績都唔差啦，都唔會畀我阿媽鬧，佢真係會問我上堂情況點，聽唔聽話，所以我好驚我媽咪。」

至於賭王爸爸，係母親罰時嘅救星，每當超蓮被三太訓示時，賭王即轉移三太視線，此外，亦係佢人生偶像：「會當爹哋係偶像，細嗰無咁會，o依家越嚟越會。我見到佢生活化一面，佢對屋企人好錫，成日陪屋企，佢到對伙計，又好嚴，好叻一個老闆，我見到佢好多方面唔同點對人，對伙計一種態度，對屋企又一個態度，可能傾生意又另一種角色，覺得佢分配好好，都好想學到佢咁成功，咁成熟處理一樣嘢。」超蓮更大爆賭王自小要迫她封為偶像，更有一個笑話：「有次見到劉德華，佢話做過我爹哋，拍過部戲叫《賭城大亨之新哥傳奇》，我返去問爹哋，佢知道有呢部戲但係冇睇過，我迫佢陪我睇，佢好多意見，最大意見係佢話『我後生靚仔過劉德華啦』我就答『你冇嘢嗎，點會呀？』完全係反對，到o依家睇番我都覺得係，佢後生真係好靚仔，一定係爹哋靚仔過劉德華。」

超蓮同猷啟呢對龍鳳姊弟感情好，更常常聯手對付家姐超雲，她笑言：「永遠細個都係二對一，我哋永遠黐埋一齊，我家姐細個都好有威嚴，咁所以我都係曳，會同細佬一齊曳，佢自己乖乖女，不過阿媽話家姐要尊重，所以二對一都係佢嬴，唔會有佢輸局面。」另外，其他房的兄弟姊妹，超蓮就封二房長女超瓊為偶像：「佢係女偶像，佢好成功，作為家姐，好look up to佢，可以做到佢咁叻就好。」

採訪：梁錦雯、譚倩宜
攝影：林德雄
攝錄：吉吉、馮峰
協力：林賓尼

更多娛聞，喺晒《娛果》
http://fb.com/appledailyent