【本報訊】昨日凌晨上演的歐聯決賽峯迴路轉，在香港，也上演了一幕球迷睇波奇遇記。卡拉OK連鎖集團多間分店都涉嫌利用小米盒子等機頂盒，非法直播歐聯決賽。其中一間分店的三四十名球迷鼓譟，半場休息時獲店方免收任何費用，但睇波節目宣佈腰斬。
關注財政預算團體「青年重奪未來」成員陳文威是其中一名受害人，他說前晚致電Neway查詢有否歐聯直播，對方表示有，遂與朋友前往深水埗宇宙商場分店睇波，費用每人約240元。

畫面質素奇劣

惟球賽開始後，電視畫面質素奇劣，「唔止鬆郁矇，直頭起晒條狀」。陳文威說，他們向店方反映後，經理進入房間處理，其間發現電腦屏幕出現小米盒子的介面，然後電視畫面變了CCTV5的歐聯直播，顧客要聽普通話。「成間店有成六、七間房嘅顧客都係為咗睇波而來，有成三四十人，佢哋好鼓譟，結果經理話唔收錢，我哋半場就走人」。
據高登討論區網民反映，荃灣及屯門Neway都有類似情況。本報昨日未能聯絡Neway負責人，而深水埗分店一名職員則矢口否認事件：「我哋冇得播（歐聯），一早cut晒有線。」記者表示有圖片和短片作證，他則着記者聯絡「寫字樓」。
剛結束的歐聯足球賽事本港直播權由有線擁有，受到《版權條例》保護，侵權人士最高刑罰為監禁4年及就每份侵權物品被罰款五萬元。有線電視發言人回應稱，如發現任何侵權行為，一定會追究。她促請有關人士向有線提供資料，以便有線聯同相關部門跟進。