新加坡聖淘沙名勝世界嘅環球影城(圖)呢個月18日開咗鑼,反應好熱烈,唔少飛都被旅行團掃咗,訂購機票加酒店套餐嘅自由行散客去到影城門口先知冇飛買都幾掃興。新加坡航空所屬嘅新航假期,啱啱推出咗連環球影城門票嘅4日3晚自遊行套餐。
新航假期嘅Athena話,環球影城新開張啲門票好鬼緊張,佢哋同影城聯繫好耐,終於攞到門票,但最早都係要下月19日入場,「復活節就一定冇飛,我哋家都同影城傾緊仲有冇早過19日嘅飛。」今次自遊行套餐包括乘搭新航來回新加坡機票,入住聖淘沙酒店三晚連早餐,包影城一日入場票,以及聖淘沙三項景點門票等,套票價錢$4,899起,其中入住啱晒一家大細嘅節慶酒店要$5,599,入住boutique路線嘅邁克爾酒店就要$5,799。有興趣致電28708788查詢,或瀏覽網站 http://www.sia-holidays.com。