徐雨石剛周三（4日）爆大冷「中華寶貝」，而對上一匹頭馬，原來是12月7日的「亞馬寶寶」，可反映這個倉口對上一個月接近冬眠！

話雖如此，剛周一（2日）出報名時已發現徐廐今次參戰馬有點睇頭，可能是反擊大日子，既然周次夜馬有「中華寶貝」無心插柳，更可加強今期捧場信心。

第四場「勇冠多」初出跑田草1200米未有走勢，剛戰再作新嘗試跑泥地1200米，賠率卻由27變為18倍，似乎知情人士覺得表現會有改善，結果自外檔起步後即盡放，頭800米開45秒32，還快過同日二班同程，所以「勇冠多」跟到對手氣咳，只有贏過三班泥地同程的「勁優秀」能將牠擒下，這席亞軍絕不簡單。

復課後又拍跳又試大閘，足足等了一個月才吼泥地1200米捲土重來，埋門配蔣嘉琦試泥閘拉士捉到實不過僅敗，但最終帥印還是落到雷神手中，大可解讀「勇冠多」今次要萬無一失。

既然徐廐今次有過關纜躉，當然要搵廐侶配合起孖；第八場「瑞士雄心」選擇在國際賽日初出跑三班強組1200米，還要馬房甚少自購馬爭頭圍，冷至99倍可以理解，而「瑞士雄心」直路初仍是包尾，但到200米開始撻着，三兩個箭步已大幅追前，走勢吸睛程度，更勝再出只輸馬頸位跑第二的「勝利導航」。

以後駒作指標，「瑞士雄心」今次與「勇冠多」攜手起孖，並不會令人感到意外。