隔牆有耳:
60年代25kg風球人手掛 - 李八方

蘋果日報 2017/06/05 00:00


人手掛風球?聽落係咪有啲不可思議,但以前香港有颱風時,真係由人手掛起信號㗎!
天文台1917年起喺信號站懸掛不同形狀嘅黑色標誌,俗稱「風球」,喺六十年代,信號站多達42個,大部份設於警務處同海事處所屬範圍,風球全由部門人員掛上同除下,至七十年代陸續關閉信號站,長洲信號站就係最後閂嗰個,2002年1月1日完成任務,關門大吉。
加入天文台逾30年嘅總科學助理馮國柱曾經喺長洲信號站當值,掛風球係職責之一,佢接受《政府新聞網》訪問時憶述,有次凌晨2時一個人掛風球,由於風力太大,掛時聽到一聲巨響,最初仲以為風球撞咗啲乜,原來係強風將閘門都閂埋。強風暴雨中掛風球,馮國柱話工作絕對唔容易,通常要兩三人合力,「有人負責控制升降,也有人負責拉緊條繩,固定位置」,原來風球重約25公斤,每次風球變,佢哋又要出動調整標誌。
97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk