曾於1998年執導人氣韓片《八月照相館》嘅許秦豪導演，其後執導嘅愛情電影《春逝》亦大受歡迎，《春逝》於2001年上映、由韓國「氧氣美女」李英愛及劉智泰演出，電影於當年獲頒「第21屆青龍電影頒獎禮」最佳電影，愛姐亦憑該片於「第1屆釜山電影評論家協會」獲頒最佳女主角。

《春逝》講述調音師尚優(劉智泰飾)與電台主持人恩秀(李英愛飾)相遇後相愛嘅愛情故事，不過因為恩秀經歷過離婚，令佢對尚優嘅感情都失去信心，隨後恩秀斷然選擇分手，令尚優大感傷心。

而據韓媒《OSEN》報道指，許秦豪導演近日與愛姐、劉智泰會面，正積極商討拍攝《春逝》續集嘅事，據悉由於今次續集同電影已經相隔16年，所以續集內容亦以男女主角分手10年以上為主線，再交代兩人嘅故事。

拍攝《春逝》續集嘅消息曝光後，劉智泰透過所屬事務所立即否認拍攝消息：「近日的確與許秦豪導演私下有見面，亦有輕輕提過相關續集嘅話題，但冇確實具體事項。」至於愛姐亦回應：「曾聽聞《春逝》或會拍攝續集，假如真係開拍亦有演出嘅打算，但始終未落實係咪開拍。」

不過網民就紛紛留言表示唔贊成開拍續集：「兩位主演都已經為人父、人母，好難再投入感情」、「停留喺當時嘅結局會更好，唔一定要拍續集」、「續集可能比唔上舊作，希望唔好毀咗經典」等。

更多韓流，喺晒《娛果》
http://fb.com/appledailyent