人稱「大華」嘅葉尚華，今日喺《體育世界》結尾告別片段中出現。《蘋果》今日聯絡大華，佢話自己70年代其實喺無綫做《足球雜誌》先，之後先間中客串做《體育世界》，佢話《足球雜誌》可算係《體育世界》前身。

大華話：「嗰次係第一次有足球節目（《足球雜誌》），每個星期播，因為嗰時冇得睇外國足球，香港係收唔到，唯有將啲片段剪接埋做半個鐘頭介紹，國際足球、歐洲足球，然後半個鐘頭做本地足球聯賽。」

問到對無綫結束《體育世界》同解散體育組點睇，大華話：「o依家好難講，因為o依家啲女人話事，啲女人唔鍾意搞體育嘅嘢，全部拍劇㗎嘛。體育節目其實好緊要，o依家後生啲人都鐘意睇體育節目㗎嘛，我唔知點解佢哋要解散體育組，冇可能嘅事！」大華慨嘆香港o依家搞體育嘅人唔多，尤其是電視台，佢話：「你睇吓有乜嘢體育節目係做得好吖？冇呀！越做越曳。」

精選娛聞，喺晒《娛果》
http://fb.com/appledailyent