李八方777回顧特輯︱被制裁、禁上京、狗咬狗 車公靈籤又中 林鄭無所遁形
蘋果日報 2020/12/31 00:04
2020大事回顧林鄭抗疫制裁
超現實嘅2020年終於過去，下年會點無人會知，既然係咁，不如溫故知新。今年初車公話過「天眼恢恢疏不漏」，一於就同大家睇返呢一年嚟，香港市委書記（a.k.a特首）林鄭月娥喺不漏嘅天眼下如何過活？其實都相當警世。
早喺舊年疫情爆發之初，精明嘅香港人已經獻過好多計畀林鄭，但係林鄭一句：「貿然停咗香港嘅正常活動就係跌入圈套」，就令到香港呢一年喺「圈套」入面無限輪迴。
記唔記得年頭嗰陣，大家同民主派一齊叫政府全面封關？當時林鄭話咁樣係歧視。不過到年尾，林鄭就唔畀喺英國嚟香港嘅人入境，連香港居民都包括在內，呢下回力鏢，黑色幽默程度唔講得笑。
林鄭（右）早前宣佈禁止來自英國的客運航班降落。資料圖片
年頭拒封關 年尾禁英港人返港
大家又記唔記得林鄭接受訪問時講到牙斬斬，話自己唔驚被美國制裁，因為佢喺美國無資產，又唔嚮往去美國，最多咪唔去！結果佢真係俾人制裁，仲話自己無銀行戶口，用現金出糧，喺屋企（禮賓府）有好多現金。如果真係覺得no big deal就唔使拎出嚟呻啦。
不過，林鄭就係鍾意死撐，全香港人都知㗎。最近打疫苗有冇得揀單嘢，好清楚喎，但撐還撐，惡果咪又係佢自己食返。好似民主派被DQ同總辭後，林鄭咪好得戚咁話，對於議會可以更快地通過具爭議嘅議案「更加興奮」，結果佢真係好興奮呀，興奮到喺《施政報告》宣佈收返啲建制派有保留嘅開位申請吖嘛，而個議會亦因為疫情而會都唔開多次，真係咩面都丟晒。
《施政報告》原於10月中公佈，但林鄭就因為「等埋北京」，結果延至11月底才發表。資料圖片
年頭打小報告 年尾被建制狂砌
講到無面就點都唔及以下呢單⋯⋯又係同《施政報告》有關。《施政報告》原本10月中公佈，但係林鄭就話要等埋北京所以押後，仲話自己10月底上京。真係以為自己係當家？11月頭北京開五中全會呀，北京要員得鬼閒見佢，終於咪又要私私縮縮咁押後上京，連擦鞋妹都做唔好，呢啲咪羞家囉。
真係有因必有果。正如年頭《蘋果》披露嘅林鄭抗疫「小報告」，林鄭衰格到連自己友建制派都鬧，話好失望建制派無同政府站在同一陣線，甚至人身攻擊佢。到年尾成班建制派就攞抗疫問題出嚟喪鬧林鄭，好似有啲作家仲話咩「我不是建制派」，徹頭徹尾嘅狗咬狗骨。
所以呢，車公係靈嘅，好似籤文另一句「天理人情只要公」咁，有解籤師傅話車公係同林鄭講，做咁多衰嘢係有報應㗎。總而言之，好事唔怕做，壞事就唔好再做，嚟緊新一年，無論香港人喺邊都要努力、加油，因為「邊度有人，邊度就有奇蹟」。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！