客貨車司機除了長時間駕車、追時間，還要搬搬抬抬。女人要擔當這崗位，在一群男人堆中佔一席位，實在不易。入行三年半的譚小姐（B女）直言起步時覺得難：「我係P牌入行，手車唔得，又唔熟路，難度高好多。初入行要夠膽問，好多行規都不曉，如怎樣收費。」

B女每日平均工作12至15小時，一般要朝九晚十二。不過女人做這一行，有時會被客人嫌棄，通電話聽到是女司機便立刻拒絕，認為女人一定無法搬運。「好多客上車都會好奇，有啲說話難聽嘅，真係會用鄙視口吻同你對答。」她認為女司機在馬路上始終較蝕底，但她不甘屈服，「好多職業司機見我係女人，就會篤油過我頭，唔好俾我feel到，我唔會畀你過囉。你打晒燈、揮晒手，我當然會讓，但你想恰女人就唔得。」

這一行要好天斬埋落雨柴，但B女認為時間相對易控制，「仔仔放假嘅日子，會盡量hea啲接order，如果佢返學好唔開心，總之佢最需要我嘅時候，我會立刻停工返屋企。」為了爭取親子時間，她有時更會帶埋仔仔跟車開工，「佢鍾意遊車河，有時冇咁旺會帶佢周圍去，話佢知去了哪一區，接了甚麼單，現在他會知媽媽係靠GoGoVan賺錢。啲客見到都唔會介意。」了解媽媽工作多了，自然學懂關心，只要仔仔關心慰問一句：「今日辛苦嗎？啲客好唔好呀？」這位GoGoMum便會暈晒浪，多辛苦也不怕。

記者：許維雅