許志安、劉浩龍(師兄)今日到九龍灣出席「MOOV 跑動音樂」活動， 提到安仔日前獲Big Four等一眾兄弟及太太鄭秀文(Sammi)慶祝51歲生日，安仔話：「好少可以咁齊人，約到一齊食餐飯好開心。」問到Sammi送咗咩生日禮物？佢話：「有嘅，一啲實用嘢囉。」

講到Sammi最近着住泳衣影唱片封面，造型相當性感，安仔話：「係囉，我都有睇，泳衣襯西裝真係幾靚。」過幾日就到太太生日，安仔話已經諗好會送咩俾太太：「都係啲實用嘢啦，或者送運動裝，佢呢排咁鍾意做運動。」安仔仲笑言或者試下自己織件冷衫：「我都識啲㗎，上三針下五針吖嘛，織埋自己個樣上去。」

同樣日前生日嘅師兄就表示，生日正日約咗鄭希怡(Yumiko)嘅佢囡囡梁浸浸，師兄話：「我今年生日嘅願望就係想同梁浸浸單獨食飯，同Yumiko講咗好耐終於成事。」咁容祖兒有冇同你慶祝？佢連講三次：「我今年淨係約咗梁浸浸，生日已經過咗啦，再約就要下年。」

精選娛聞，喺晒《娛果》
http://fb.com/appledailyent