荃灣荃立方同樣是兩年幾前由劏場大王尹柏權劏出的產物，兩年以來，商場以平租招徠，今日仍然做唔起。

記者直擊，商場第一層有約57間舖，其中約25間吉舖，出租率約56%。樓上兩層，出租率更低，分別約23%及40%。

Cherry之前從事會計工作，後來轉行做化妝品Sales，賣下賣下，心諗不如自己做老闆。半年前，進駐荃灣荃立方商場第一層，因為租金平，每月僅1,000元，租約3個月，當時該樓面出租率一度填滿，吸引不少人流，她憶述，那時可以賺返舖租，但人工就欠奉。

隨住商場由小業主收回，月租1,000元的優惠完結，cherry轉租場內另一個面積約30方呎的舖位，月租加至約3,000元，過去3個月，人流更少，人工仍未賺到。

她預期每小時商場可以吸引20至30人，「樓下好多人行，仲有個小巴站，覺得呢度應該唔差。點知開咗舖，比想像中差，唔知點解，真是無人上來行。」結果?她估計，每小時僅5、6個人。她認為，可能宣傳不足。

生意淡靜，「目前小業主陸續收回舖位，已委聘與市場推廣公司，想留多陣，睇下係咪推廣有用。睇多3至6個月囉。」


本報記者陳家雄