三個月間，由出席撐警集會到力數水炮車如何傷害巿民，自覺無辜被「染藍」的印度協會前主席毛漢褚簡寧（Mohan Chugani），親歷一場噩夢後漸得頓悟，「唔知係咪個天特登安排我喺嗰度，感覺到咁嘅嘢就反映返，等政府就聽啦。」他笑言自己是「100%香港人」，視香港為家，坦言電視上年輕人被捕被打畫面令人心痛，7.21、8.31及警員沒有編號等事件亦令他不解。民間五大訴求依然強烈清晰，他認為政治問題其實警方無從解決，惟有將自己奉行的營商金句贈予特首，「The first offer is the best offer.（答應第一個叫價總是最佳選擇）。」

記者　黃翠儀

印度裔商人毛漢，是著名傳媒人褚簡寧（Michael Chugani）的兄長，於香港土生土長能說一口流利廣東話，家住尖沙嘴鄰近警署位置，「之前啲（催淚）煙都有飄入嚟，閂咗窗都聞到。」上月20日一段警察以水炮車攻擊清真寺片段，令當時身處寺外的毛漢一夜於香港以至國際「成名」。他被藍色催淚水射中，全身「染藍」不適要入院治理，至今晚晚難以安睡，皮膚經常痕癢難當，每日仍要搽藥膏滴眼藥水，「我收到好多電話（慰問） ，印度都有啊，杜拜有新加坡又有，個仔問我點解你上咗YouTube嘅？諗諗下，初時起嗰件事（逃犯條例）係好簡單嘅，點解搞到咁大呢？」

「染藍」噩夢多日未散　促公開藍色水成份

他回憶那場噩夢突如其來，當時數人站在寺前最多3、4分鐘，水炮車快速駛到，開咪含糊宣佈不足1分鐘便射來強勁水炮，全無時間予人考慮如何撤離，「咁你都要畀個機會人行吖，行都唔畀？已經呯！射兩次停喺處射；我仲以為佢同我影相，（車頂鏡頭）Focus，第一下已經即刻嚟啦，而家香港又唔係打緊仗，我73歲有糖尿病有高血壓，成身會辣嘅好似着咗火咁。」痛得無法張開雙眼，幸好旁人帶他去用水暫時沖身，入院後護士仍叫他換衫再沖身，兒子為他帶來替換衣物，唯獨沒有換鞋被化學物「醃咗3粒鐘」，至今仍不時感灼痛。

沉澱過後，他認為政府處理手法很有問題，「架車係咁射射到好多人，OK射中人拉到人，咁你點樣治療？你都要有衫俾受害者換先係咪？如果係男人我唔怕，我着條底褲企喺度，女性得唔得？唔得呀嘛，咁你（沖身後）着返嗰啲衫，咪又領返嘢？」藍色水成份至今未明，他希望政府公開，「去到私家醫院醫生唔敢醫，咁你用得就要話埋畀人聽事後點醫嘛。」
高官紛紛來電道歉問候，警務處副處長鄧炳強亦曾約他見面會談，但對於警方「誤中」之說，毛漢不以為然，「唔係（射得準）買嚟做乜嘢吖？」他漸漸覺得，或許是天意安排他感受水炮「染藍」之痛，「譬如一個普通市民哎呀辣到我抽筋呀，特首或者未必信」，現時他可以自己身份和人脈，令政府正視問題。

斥721報案中心繁忙只是藉口　831警截車扑人「 好唔公平」

上周日（10月27日）印度排燈節他出外拜神，路上再次目擊警察追捕「細路仔」過程，又聽到女士被捕時大喊救命，「我都係同鄧Sir講，唔需要幾十個警察，對付一個女性，一個示威者。」談起警方做事手法問題，毛漢習慣每日閱報，記得由報紙上讀到警方解釋7月21日報案中心線路繁忙，「呢個係藉口，我始終唔信話999打唔通呢就無差人喺現場，如果差人喺現場，就無（白衫打人）呢件事發生啦。」

8月31日巿民血染太子站一幕，亦令他對充滿疑問，「我仔同女都話好唔公平，好唔公平，突然間放啲差人落去扑扑扑啲人，港鐵係一個運輸機構，係應該運作，根本唔知差人有冇咁嘅權叫你閂唔好開，佢無咁嘅power，我諗特首都無呀。」他指，除非實施了緊急法，是戒嚴狀態那就可以，「所以我同你講，差人過晒界就咁解。」而且看到很多新聞報道，蒙面警員身上並無編號，「記者問佢係唔係差人，佢又唔答；而家令到成個香港社會，大部份人都憎差人，又何必呢？」

強調出席集會非為撐警只為香港　料獨立調查委員會勢成立

他在7月中出席「守護香港」集會，強調並非為「撐警」而是代表少數族裔發言，「我聽到個活動叫Protect Hong Kong，唔係Protect Hong Kong Police。」翻聽全篇發言，的確有講明「I am not here to point any fingers at anyone（我不是要怪責任何人）」，主要表示希望香港重新出發，政府與青年作有意義的對話溝通。
　
他續指，清真寺一事特首「Damage control（傷害控制）」反應迅速，但為何當初一百萬、二百萬人上街時，「已經係差唔多着晒火，點解唔即時處理件事呢？」他曾向特首直言，她身邊有很多人所給予的建議「畀得唔係幾啱，你應該自己明白。」營商時奉行老前輩所教金句，亦希望特首參考，「The first offer is the best offer，唔好拖下拖吓，啲要求一路一路高㗎喇，所以越快搞掂就越好。」他亦認為行政會議要適時換畫才可，換上一些為社會及青年接受人士，「擺返成班都係嗰啲上咗年紀嘅，我唔係話佢哋係壞人，但係英文講係Out of touch of the reality（離地）。」

數個月來香港情況急變，友人問他為何着緊，他總會回答，「因為香港is my home（是我的家），你感受唔到我感受嘅，我唔會移民。」事到如今，他指已不可能不成立獨立調查委員會，但調查為公平計要全面調查，亦要警察與示威者皆獲特赦才公平，「始於係政治問題，除咗特首讓步，無人解決到，但係示威者一樣讓步，要大家一齊讓步，我唔信呢個世界有事解決唔到，韓戰都解決到。」

-----------------------------
2019區選專頁
光復香港 11.24踢走共產黨
-----------------------------
【撐學生】
召集有心人 撐學生全年睇《蘋果》
立即按此
-----------------------------
百日特刊記載香港人逆權之路
《逆權百日》
《自由之夏》中文版
《自由之夏 Summer for Freedom》中英對照版