大家都睇淡明年經濟前景，打工仔最希望：「唔使裁員。」更希望：「加人工。」華華聽聞，四叔李兆基旗下嘅恒基地產（012），除咗出雙糧，明年仲平均加薪5.5%。香港總商會之前調查，近四成受訪企業預期明年加薪5%，即係話，恒地加薪幅度輕微「跑贏大市」。

另一間以收租為主嘅地產商恒隆地產（101），都有雙糧出，但係明年加幾多人工，有冇花紅，要明年1月先知。
除咗地產商加薪畀員工，賭王旗下嘅澳博（880）前日亦主動率先公佈，加薪5%至10%，仲會有1至1.5個月獎勵薪酬，原則上較低薪嘅基層員工，人工可以加多啲，仲會增加年假等優化福利措施。濠賭股今年生意勁好，同員工分享吓，大家happy。
不過，有人歡喜有人愁，近期港股交投淡靜，新股唔係好去到，個別券商已經開始要員工勒緊褲頭。外電報道，為咗應付明年艱難嘅市場環境，中信証券（6030）旗下中信証券國際嘅高級職員、聯席董事或更高級嘅員工，平均減薪5%。冇錯，係減薪！今次減薪將會影響三分一嘅香港員工，大概90至100人。哇，希望其他券商唔好跟住減啦！

李華華
mailto:[email protected]