「我要真普選」訴求無處不在，就連哈囉喂亦要惡搞一番。凌晨過後，一群因雨傘運動而認識的學生，組成殭屍隊巡遊集會區，沿路屍聲屍氣大叫「我要真普選，梁振英隻妖孽快啲落台」口號，又向市民派發「我要真普選」字條。

扮演道士的學生Tim，手持銅鈴和八卦鏡，邊搖鈴邊帶領殭屍群「跳住」來回彌敦道兩次，「八卦鏡係寓意用嚟照梁振英，收佢落台。」Tim又感慨指，每年萬聖節都可以在其他地方歡度，但政府迫令市民要在集會區內過，「如果政府係做得好，就唔需要人出嚟瞓街。」他表示殭屍群將直落金鐘集會區，以殭屍跳方式表達訴求。