影音專區：
百萬影音發燒友「玩影音好辛苦」
天外有天，人上有人，正好比喻玩影音，往往一山還有一山高，今次找來玩影音足足25年的Joseph，粗粗地將屋企一角的影音產品小晒冷，區區其中一部分已值$1,114,500。而佢玩的就不是現時好多人喜歡的多聲道，或5.1、6.1、7.1嘅環迴立體聲，Joseph就只玩兩聲道，而且玩落有堅持，不過佢總結玩音響嘅心得，真係好辛苦，而且重要係有氣有力嗰隻！ 記者、攝影：馮彥彰
人物檔案
姓名：Joseph
工作：開發智能家居設備
玩影音年資：25年
「做影音」所以「玩影音」
Joseph初入行時是負責售賣高級影音產品，由於工作關係，所以有機會接觸到大量高級影音產品。
賣「高級影音產品」同賣「一般影音產品」最大差異之處，就係買機嘅通常都係識貨之人，所以要Sell好一部機，除了要對影音有極深認識外，重要有親身嘅體驗，所以亦因此促成佢自己都玩埋一份。
百萬音響重點推介
Joseph家設計十分標致，四四方方百幾呎的廳中，就放了一部大電視，側邊就有兩大個屏風喇叭，然後就裝隔聲及隔光，十分專業。
靚影音部部過百磅
玩靚影音雖然可以滿足你視聽之娛，不過當中有啲苦處，真係不足為外人道！尤其當你愈玩愈勁後，除了花錢外，重要有力氣，好似Joseph咁，每部機嘅重量都動輒上百幾二百磅，真係冇番咁上下力氣，都好難搬得佢郁。最慘係當要換新機，成日要搬上搬落，再加埋駁線、試擺位同試機，搞一搞都要幾日，真係每次換機都有一種筋疲力盡嘅感覺。
另外，由於大部分高級影音器材都係使用高電壓電流，如果將房內器材全開，真係開了冷氣都猶如置身火爐一樣。
靚聲DVD專業之選
Joseph最愛嘅DVD一共有5隻，佢話選碟時會以聲靚行先，然後先會再睇佢畫面部分，暫時嚟講，佢認為最聲靚嘅音樂DVD分別為《BEEGEESONENIGHTONLY》、《Santana》同埋《GRPALL-STARLIFEFORMTHERECORDPLANT》，而影像方面，佢嘅至愛就係：《寫我情深》同埋《abug'slife》。
本周熱賣貨 《魔戒首部曲：魔戒現身》老翻完全唔掂
喺英、美等地剛上畫，並馬上叫好又叫座嘅《魔戒首部曲：魔戒現身》（《TheLordoftheRings:TheFellowshipoftheRing》），竟然咁快就有老翻DVD出（香港要1月31日上畫），真係非常嚇人！不過更嚇人嘅，係呢隻戲院盜錄版嘅影像質素非常差，而且有聲畫唔夾嘅情況。須知道呢套戲係有份提名金球獎電影（包括有：MotionPicture、Director、OriginalScore、OriginalSong），如果用老翻睇完全係一種浪費。如果真係等唔切，不如上網睇住Trailers先啦！
網址： http://www.apple.com/trailers/newline/fellowship_of_the_ring/ 大友克洋《大都會》本周最搶手老翻DVD
由於呢個星期係公眾假期，本地三區、日本二區同美國一區全部都冇新碟返，至於老翻場嗰邊，可能睇到呢個空檔，所以喺今個星期狂入新貨，例如早前同大家提過大友克洋嘅經典之作《大都會》，最近就出咗老翻DVD，一碟有齊中、英兩種字幕，再加上聲畫都靚，所以成為老翻場本星期熱賣貨。
新碟方面，就快喺「有線」重播嘅《黃金戰士》，最近翻出咗新版。另外，筆者重收到風，日本嗰邊啱啱喺今個月一號出咗DVD版《機動戰士0083星塵回憶》同《一年戰爭劇場版》，聽聞都有碟會喺下個月返。不過講到尾，老翻質素真係冇保證，想睇好戲一定要買正版。
文：睇碟王