卓韻芝噚晚起一連兩晚喺灣仔伊利沙伯體育館做楝篤笑，前晚頭場有阿芝外婆、黃耀明、徐天佑、張栢芝同鄭秀文（Sammi）去捧場。阿芝開騷後即呼籲觀眾唔好低頭玩手機，留心睇騷。

阿芝仲玩埋特首女兒梁齊昕，學佢抗拒被追訪記者影佢啲朋友時，齊昕講：「唔好好影我朋友，Whereismymum？」阿芝話要幫齊昕改番個英文名，現場觀眾起哄大叫Lobster（龍蝦），阿芝話：「Lobster係媽咪，佢應係LobsterJunior，齊蔭即bob頭，又可以叫LeungBobHair。」阿芝又爆料外婆成日趁多蚊叫佢出露台收衫，佢詐型外婆唔錫佢：「Sheisnotmybiologicalgrandmother！」觀眾聽到勁笑。

成晚騷又以單身女仔做主題，阿芝講到激動同搞笑位，忍不住爆粗，佢話今年9.28雨傘一周年，阿芝當日食韓燒同朋友影咗相都唔敢擺去facebook，佢話：「o依家好多網絡判官，搵開心嘅人判，每個人都有啲罪。」阿芝又話要喺現場揀無罪嘅人，適合上天堂，現場一齊投選，投到話徐子淇個孻仔，阿芝即話：「唔得，因為佢係富二代，有原罪，Juno個樣又似伯多祿，計起嚟得梁振英可以上天堂，得佢冇做錯嘢，同埋林鄭月娥，天堂為佢哋預留咗位置。」不過阿芝話天堂如果有佢哋，佢寧願落地獄，觀眾歡呼拍手和應。