港股唔聲唔聲連升五日,累積挾近千點,唐牛身處嘅炒房,久違嘅戰意開始重現。美銀美林最新基金經理調查發現,基金經理現金水平達5%,為一年以來新高。有22%基金經理處於防守mode,比起一個月前嘅11%大增一倍。由於基金唔同散戶,要有貨底先可以同客交代,從樂觀角度睇,一旦股市轉勢,呢班芬佬一定會瘋狂搶貨,屆時升勢只會更急更勁。
講今日推介前,先update一下最近嘅推介︰彩票股華彩控股(1371)搶高11%,蓄勢突破3月以來嘅下降軌,世界盃唔夠一個月就開波,睇嚟反彈有排未完;能源股威華達(622)造旗後大棍崛起,成功升抵短炒目標0.23元,有跟進嘅戰友可斬邊留邊,食盡餘下升浪;華潤水泥(1313)有靚仔業績支持,噚日再炒高4.4%,目標價5.54元不變。