隔牆有耳：
岳少請飲　齊人過開立會　
被指搶走男神　楊太：好多人好過佢 - 李八方

蘋果日報 2017/12/09 05:20

隔牆有耳楊岳橋EVE 結婚
    公民黨男神楊岳橋今年9月就同事務律師女友Eve去咗丹麥註冊結婚，噚日下午楊生楊太就喺立法會附近舉行結婚酒會，宴請全體立法會議員同記者。岳少同老婆Eve都好識做酒會之前就多次錫錫畀傳媒影相，當楊生楊太收到傳媒送上嘅賀卡，更加露出驚喜表情，睇嚟兩人都相當有喜劇細胞。
    empty
    民主派喺財委會完會後趕到賀。
    楊太讚未拍拖前好浪漫
    男神封盤，楊太Eve被問到結婚消息令萬千少女心碎，佢有乜感想？點知Eve竟然話︰「好多人好過佢！」不過之後又兜番，話其實岳少好好，咁八方就梗係追問，岳少有咩吸引之處？Eve就大讚岳少孝順同搞笑，而且個人都好浪漫……不過係追到手之前。
    Eve又透露去丹麥註冊結婚係佢主意，因為只要120歐羅，而且可上網登記，兩人親身出現就可以結婚，真係最快最方便嘅結婚方式。
    岳少請飲，不論泛民同建制派議員都畀面出席，立法會主席梁君彥、秘書長陳維安都有現身，經民聯盧偉國更捧住一大束鮮花到場，而梁美芬就送上一張書籤。直至財委會完會，唔少民主派都趕尾場出現，慢必陳志全更加罕有打煲呔現身，同場仲有被DQ 嘅姚松炎同長毛梁國雄，真係連平日開立法會大會，都好難得咁齊人同咁開心。

    李八方
    empty