當年今日

股海實戰錄:反彈市追貨勿心急

蘋果日報 2002/03/28 00:00


未到耶穌受難日,淡友先行受難。前日期指高收兼轉炒高水,好多人都估到今日會挾淡倉,但能夠挾得咁應,都要外圍因素配合至得。今日輪到場外結算,話唔定重有一轉挾倉行動。
候低大買藍籌股輪嘅如意算盤,暫時打唔響。不過,大市是否就此一飛沖天,趙飛雲尚有保留。首先,正如鬼佬網站所講,WallStreet已變成SwingStreet,美股近期反覆無定,今日急升,明日又可以急跌。前晚杜指雖升71點,但唔係高收,個勢唔算好強,如果呢兩日又有反覆,甚至跌穿短期升軌,則港股想升都幾難。

技術指標尚未轉勢
港股噚日回升兩百點,重返50日線之上,形勢確係好番啲。不過,10日線(11030)同20日線(11007)尚未衝破,各項技術指標還未轉勢向好,故此暫時仍以反彈視之。
趙飛雲噚日未有追貨,但策略上就稍有修改。候低買貨依然不變,但由於恒指已補回下跌裂口,即使再次向下,10700水平頗有機會守穩,可先買第1注,入貨後若跌至10400水平,則全力出擊。當然,若恒指不回續升,並重返上次雙底頸線11108之上,則可動用1/3資金入市。